حاجي محمد شادكام

ءبىز ەڭ اۋەلى، اللانىڭ، پايعامبارىمىزدىڭ (س.ع.س) «مۇسىلمان بولىڭدار» دەگەنىن، اراب بولىڭدار دەمەگەنىن جاقسى ءتۇسىنىۋىمىز كەرەك. قايتا ءبىزدىڭ حالىق بولىپ، ۇلت بولىپ بولەك-بولەك ءومىر سۇرەتىنىمىز اللانىڭ قالاۋى (قۇجرات سۇرەسىندە سولاي ايتىلعان). ءبىز ءبىر-بىرىمىزدەن وسىلايشا پارىقتالامىز. ءدىندى قابىلداۋ ارابتىقتى قابىلداۋ ەمەس. ۇلى ەلشىمىز (س.ع.س) وسى قاۋىمنان شىققانى ءۇشىن قۇرمەت ەتەمىز، سىيلايمىز. سوندىقتان، حاق ءدىنىمىزدى ءتۇسىنۋ، تەرەڭىنە ءۇڭىلۋ بارىمىزگە ورتاق مىندەت. بىزگە فورما جاقتاعى وزگەشەلىكتەردەن گورى، جۇرەكتەگى وزگەشە جاڭالىق ابزال. قازاقتىڭ ءوز كيىمى، قالپاعى، تاقياسى، شەكپەنى، كيمەشەگى، شىلاۋىشى، ساۋكەلەسى، كويلەگى، ەرلەردىڭ ەجەلگى ساقال-مۇرت ۇلگىسى وزىنە جاراسادى. ۇيالاتىنداي كەمىستىگىمىز جوق. كەي كەزدە سۇننەت رەتىندە پايعامبارىمىز (س.ع.س) كيگەن دەپ، تۇتىناتىنداردىڭ ءجونى باسقا. بىراق «بوياۋشى، بوياۋشى دەسە ساقالىن بوياپتى» كەيپىنە تۇسپەگەن ءجون. ءدال قازىر بوياۋشىلىقتىڭ ايەلدەرگە دەندەپ كىرىپ بارا جاتقان كەزى. باستاعى شاش بايقۇس بىرەسە قىزىل، بىرەسە سارىعا وزگەرىپ ابدەن مازاسى كەتتى. جالاڭباس ءجۇرۋ ارقىلى ءبىر كۇنا جاساساق، بوياپ، كورسەتىپ  ناپسىگە جەم ەتىپ ەكى كۇنا جاسايمىز.

سوندىقتان، ءولى تۇردە ارابقا ەلىكتەۋ اسىرە وڭشىلدىققا، فاناتتىققا اپارسا، جالاڭاشتانىپ «مادەنيەتكە» ەلىكتەۋ، اسىرە سولشىلدىققا كىرىپتار ەتەدى. اللا ءبىزدىڭ فورمامىزدىڭ ارابقا ۇقساۋىنا ساۋاپ بەرمەيدى، جۇرەگىمىزدىڭ نۇرلانۋىنا ساۋاپ ءناسىپ ەتەدى. ياعني، مۇسىلمان بولۋ جان الەمىمىزدەگى قايىرلى جاڭالىق. ەلىكتەۋ پايداسىنان زيانى باسىم بوس اۋرەشىلىك.

داۋلەتبەك بايتۇرسىن ۇلىنىڭ e-islam.kz سايتىنا بەرگەن سۇحباتىنان